Un Paraíso Oculto

Os nosos pasos descubrindo a Galicia máis auténtica lévannos desta volta ás fértiles terras de Coristanco, un verdadeiro verxel movido pola agricultura no que destaca a pataca, famosa en toda Galicia pola súa grande calidade.

Ademais da pataca, Coristanco conta con numerosos atractivos, curiosidades que poderedes descubrir connosco e grazas á colaboración da Asociación Cultural Ponte Lubiáns de Coristanco, que xentilmente lle cedeu a Galicia Auténtica os vídeos e imaxes que aquí vos presentamos.

Nada máis.

Agora pasen e vexan!

¿Por que?

O simple feito de coñecer o Refuxio de Verdes fai que pague a pena a viaxe, no cabe dúbida.

Desviándonos uns 10 ou 12 Km da estrada Carballo-Fisterra, á altura de Coristanco, atoparemos un verdadeiro paraíso alonxado da masificación turística. Cando un se aproxima a Verdes, síntese especial. Sinte coma se descubrira algo segredo e encantado que moi poucas persoas coñecen... E dalgún xeito así é.

O río Anllóns serpentea por este fantástico lugar moldeando a terra ó seu paso, cantando en primavera e verán e ruxindo en inverno.

O lugar agradece a man do home que, por unha vez, conseguiu manter o equilibrio e a harmonía con muíños, mesas e bancos de pedra e madeira, curiosas canles de auga, etc...

O mellor é que lle botedes un ollo ós vídeos. 

E ademais...

Na aldea de Segufe, tamén en Coristanco, vive Asunción Antelo, "A Rexubeira de Bergantiños".

Esta muller de 90 anos, galega de pura cepa, soubo compaxinar ó longo da súa vida as tarefas diarias cunha marcada vocación artística. No seu pequeno museo poderemos coñecer a súa prolífica obra: esculturas en arxela e madeira, tallas en pedra, literatura (2 libros publicados)...

Entre as súas obras destaca o poemario "Páxinas da Rexubeira de Bergantiños", que foi publicada grazas á asociación Monte Branco de Ponteceso.

Aínda que o mellor sexa porder coñecer a unha persoa tan desperta e con tantas gañas de vivir ós 90 anos!! Toda unha lección. Toda unha inspiración.

Non podes perder os vídeos de Asunción, a muller do eterno sorriso.

Que vas descubrir

A ponte de Ponte Lubiáns, situado na fronteira entre Carballo e Coristanco é un lugar cun encanto especial. Historiadores coma Carré Aldao sosteñen a certeza das orixes romanas da ponte e a vía, namentres que outros sitúan a súa orixe nas inmediacións do século XV.

Sexa como sexa, a beleza do lugar é indiscutible, como poderás apreciar nas fotos e os vídeos que atoparás á dereita do texto.

Outro dos praceres por descubrir na viaxe encóntrase nas granxas Agro do Cruceiro e Casa Bustelo, e na panadería Valenza, as tres ubicadas na parroquia de Valenza.

En Agro do Cruceiro e Casa Bustelo dedícanse ó cultivo de diferentes hortalizas que comercializan na páxina www.granxafamiliar.com. Paga a pena dar un paseo polas súas instalacións guiados por Loli e Andrés ou José Antonio respectivamente, e coñecer de primeira man a riqueza hortícola da zona.

Na panadería Valenza, con Carlos e Maruxa, veremos como aínda existen establecementos que basan a súa oferta na calidade e o respecto á natureza: cocen con forno de leña e ademais utilizan enerxía solar e biomasa.

Programa da Ruta

-Ponte Lubiáns:

Esta preciosa ponte de pedra salva o paso do río Rosende, pricncipal afluente do Anllóns.

Autores coma Carré Aldao denfenden que Ponte Lubiáns formaba parte da rede secundaria da vía XX (Braga-Brigantium-Astorga) trazando o recorrido costeiro coñecido como Per Loca Maritima.

Como dixemos, non hai certezas que apoien a teoría de Carré, pero aínda así é innegable o grande valor histórico e estético do monumento.

Despois visitaremos aos nosos amigos Dolores e Andrés na súa granxa Agro do Cruceiro, a José Antonio de Casa Bustelo e a Carlos e Maruxa da panadería Valenza, onde poderemos coñecer o seu entorno, os seus produtos, as súas formas de cultivo... Ademais de facernos con algúns produtos 100% naturais!

-Museo de Asunción Antelo:

O seguinte punto da nosa visita será o orixinal museo da Rexubeira de Bergantiños, Asunción Antelo.

Nel, ademais de coñecer e marabillarnos coa protagonista, teremos a ocasión de gozar da obra vital dunha muller de 90 anos cuxo sorriso inunda o lugar no que se encontre.

É unha ocasión inmellorable para coñecer a retranca e o sentido do humor tipicamente galegos.

-Refuxio de Verdes:

Finalmente, tras emaparnos de historia e arte en Ponte Lubiáns e o museo de Asunción Antelo respectivamente, adentrarémonos no lugar máis emblemático (non por iso masivamente coñecido) de Coristanco: o Refuxio de Verdes.

Este é un lugar perfecto para poñer a proba as nosas cámaras fotográficas e para imaxinar outros mundos posibles nos que a naruteza permanece intacta e as accións do home van dirixidas unicamente a mellorar o que a terra nos ofrece.

Trátase dunha extensa área de descanso rodeada de auga e árbores, no que hai unha cor que destaca de maneira sobresaínte sobre o resto. Esta cor é, por suposto, o verde.

Máis Información

Montaje con fotos do Refuxio de Verdes  

Asunción Antelo

Concello de Coristanco

Granxa Agro do Cruceiro

Granxa Casa Bustelo