A Galicia Cantábrica: Un regalo para os sentidos

A ruta que comprende as terras da Mariña Lucense garante ao viaxeiro unha sensación de liberdade moi pouco habitual, ofrecida por un entorno sen parangón e pola presenza de curiosos personaxes ao longo e ancho das súas terras.

Dende a fronteira con Asturias (Ribadeo), ata o cabo situado máis ao norte da península ibérica, Estaca de Bares, o percorrido alberga verdadeiras sorpresas para os/as viaxeiros/as.

Sorpresas como Eido Dourado,  o paraíso artístico do pintor Celso Dourado; ou a pintoresca vila de Rinlo (Ribadeo),  na que por veces o mar chega a romper contra o feixe de brancas casas construídas sobre as rochas.

Non hai dúbida de que a experiencia é, ao fin,  un regalo para os sentidos.

¿Por que?

As razóns para perderse durante unha xornada por estas terras fanse evidentes para calquera que as teña pisado con anterioridade: praias decoradas con esculturas feitas polo propio mar, pobos situados no rompente das olas, arte por todos os lugares…

Sen menosprezar en absoluto os vestixios históricos da rexión, que hainos e moi importantes por certo, parécenos de lei destacar a fabulosa capacidade das xentes da Mariña Lucense para aproveitar os recursos que a terra e o mar ofrecen, creando deste modo formas de vida específicas desta rexión galega.

E ademais...

A inmensa riqueza da zona é algo moi a ter en conta. Dende produtos do cantábrico, como o arroz caldoso con marisco de Rinlo ou o bonito de Burela, ate creacións orixinais e auténticas como a que nos ofrece o Rei das Tortas de Mondoñedo, reposteiro de prestixio nacional.

Por non falar das míticas fabas de Lourenzá, cuxa historia poderás coñecer de preto visitando a granxa Casa Díaz. As fabas desta granxa van destinadas na súa maioría á exportación cara Asturias, onde dan boa conta delas convertíndoas na base do seu prato de máis renome: a fabada asturiana. Ademais en Rinlo poderás probar se o desexas unhas fabas con bogavante que quitan o hipo.

Que vas descubrir

Difícil de resumir: paisaxes únicas en Galicia, co predominio do Cantábrico como factor clave; tradicións que representan o modo de vida de toda unha comunidade, como a pesca do bonito en Burela; as creacións pictóricas de Celso Dourado, un artista de gran sensibilidade e sublime técnica e localizado  nun dos emprazamentos máis fermosos da zona.

Un sinfín de sorpresas que non te podes perder.

Programa da Ruta

Ver Mapa

Mariña Oriental:

-Rinlo. Nada mellor para comezar o noso periplo polas terras galegas do cantábrico que visitar a aldea de Rinlo, onde o mar baña, case literalmente, as casas.

-Praia das Catedrais. Tal vez se trate da praia con máis fama de cantas temos en Galicia. As caprichosas formacións rocosas que o mar foi esculpindo ao longo do tempo, conceden a este lugar de Galicia un encanto especial.

 -Eido Dourado. Moi preto da Praia das Catedrais, xusto  fronte á Praia de Pasada, alzase o conxunto artístico Eido Dourado. Trátase da obra de Celso Dourado, un artista local que domina a arte da pirografía e o biro-art, e que conseguiu superar a terrible adversidade de perder ambas mans nun accidente á tenra idade de 8 anos.

 Mariña Central:

-Mondoñedo: O Rei das Tartas. A hora do almorzo transcorrerá no local do Rei das Tartas, en Mondoñedo.

Ademais de gozar dunha suculenta comida, visitaremos o pequeno museo que alberga as fotografías das celebridades que ao longo dos anos probaron algunha das delicias do rei.

-Casa Díaz. As fabas de Lourenzá son un dos orgullos da nosa terra. Nesta granxa, dedicada por completo ó cultivo desta sabrosa legume e emplazado nunha paraxe natural incrible, poderás coñecer a tradición deste manxar galego.

 -Foz. No noso camiño cara Burela, a capital do bonito, faremos escala en Foz para visitar a interesantísima catedral románica de San Martiño, a máis antiga de España.

 -Burela. Burela é un municipio especial da Mariña Central. Conta entre os seus habitantes cunha ampla comunidade de cidadáns  caboverdianos/as e peruanos/as, que chegaron a estas terras buscando oportunidades no mar e que hoxe por hoxe están perfectamente integradas na poboación.

No porto de Burela está atracado permanentemente un barco-museo boniteiro no que se nos desvelarán os segredos mellor gardados da vida no mar.

 Mariña Occidental:

-Fábrica de cerámica de Sargadelos. A ruta tocará o seu fin coa visita á fábrica  de cerámica de más renome de Galicia.

Na fábrica poderemos visitar a súa sala de exposición para admirar os exclusivos deseños en pezas de cerámica, tanto ornamentais como funcionais, podendo, se o desexamos, adquirir algún recordo.

Máis Información

Arroz caldoso de Rinlo (Ribadeo)

Praia das Catedrais

Eido Dourado

O Rei das Tartas

Catedral de San Martiño

Batuko Tabanka (grupo musical de caboverdianas residentes en Burela)

Cerámica de Sargadelos

Casa Díaz

Granxa Familiar